ვის ინტერესებს ატარებს ყანდაშვილი? ადვოკატები საუბრობენ ზეწოლაზე, „კარუსელებზე“ და წინასწარ განსაზღვრულ შედეგებზე.

13-14 დეკემბერს ადვოკატთა ასოციაციაში გაიმართება არჩევნები, რომელშიც მმართველი ორგანოების წევრებთან ერთად, თავმჯდომარეც უნდა აირჩიონ. ასოციაციის თავმჯდომარის ვაკანტურ თანამდებობაზე 6 კანდიდატია წარდგენილი. როგორც წესი, ასოციაციის არჩევნები სეგმენტის სპეციფიკიდან გამომდინარე, ნაკლებად რეზონანსულია, თუმცა წელს ასოციაციის თავმჯდომარეობის ერთ-ერთი საკამათო კანდიდატის გარშემო დატრიალებულმა მოვლენებმა ეს არჩევნები საზოგადოების მაღალი ყურადღების ქვეშ მოაქცია. 

საქმე ეხება ადვოკატ ირაკლი ყანდაშვილს, რომელიც საქართველოს მედიატორთა ასოციაციის თავმჯდომარეც არის. ის ერთ-ერთია, რომელმაც ადვოკატთა ასოციაციის თავმჯდომარეობაზე საკუთარი კანდიდატურა წარადგინა. აქამდეც არსებობდა მოსაზრება, რომ ის ასოციაციაში "ქართული ოცნების" სასურველი და მხარდაჭერილი კანდიდატია. ასევე საუბრობენ იმაზეც, რომ ყანდაშვილი მოქმედი თავმჯდომარის დავით ასათიანის მეგობარია, რომლიც ადვოკატთა წრეში ასევე „ოცნების“ მხარდაჭერილ კადრად არის მიჩნეული და რომლის არჩევაც ასევე ხმაურისა და დაპირისპირების ფონზე მიმდინარეობდა 2017 წელს. თუმცა ამ აზრმა განსაკუთრებული მნიშვნელობა მას შემდეგ შეიძინა, რაც ყანდაშვილმა BMGTV-ის გადაცემა „წერტილში“ ჟურნალისტ თელარა გელანტიას ინეტრვიუ მისცა.

რა მოვისმინეთ ინტერვიუში?

ჟურნალისტი: დაარღვია თუ არა "ქართულმა ოცნებამ" საქართველოს კონსტიტუციის 78-ე მუხლი, როდესაც 28 ნოემბერს გამოაცხადა, რომ 2028 წლამდე უარს ამბობს ევროინტეგრაციაზე?

ყანდაშვილი: მე ვირჩევ ევროპას, თუმცა სამართლებრივ შეფასებაზე დაირღვა თუ არა კონსტიტუცია? - ინდივიდუალურ შეფასებამდე დავდივართ. იურისტი უნდა მოქმედებდეს დოკუმენტებზე დაყრდნობით. უახლოესი 2 კვირის წინ გამოქვეყნდა გარკვეული დოკუმენტი, რომელიც ამბობს, რომ ევროკავშირს აქვს მოწერილი საქართველოს სახელმწიფოსთვის ინტეგრირების საკითხის შეჩერებასთან დაკავშირებით. 28 ნოემბერს, როდესაც აღნიშნულთან დაკავშირებით წინა წელს გაკეთდა განცხადება, მე პირადად ეს ინფორმაცია არ მქონდა",- თქვა ყანდაშვილმა [სტილი დაცულია]

ამის შემდეგ ჟურნალისტის კიდევ ერთ რეპლიკაზე, რომ 28 ნოემბრამდე ქვეყანამ ბევრი ეტაპი გაიარა მათ შორის  ევროკავშირის 9 და 12 რეკომენდაცია, რომლებიც შეუსრულებელი დარჩა. ყანდაშვილის პასუხი იყო ის, რომ " პოლიტიკურ დისკურსში როცა ვიქნებით ვისაუბროთ. მე პოლიტიკურ შეფასებებს არ ვაკეთებ, მე ადვოკატი ვარ“.  

ამავე ინტერვიუში ყანდაშვილმა თქვა, რომ დღეს საქართველო ევროინტეგრაციის გზაზე დგას. ადვოკატთა ასოციაციის თავმჯდომარეობის ერთ-ერთი კანდიდატი ამ განცხადებას აკეთებს იმ ფონზე, როდესაც წელიწადზე მეტია, საქართველოს მოქალაქეები უწყვეტი აქციით აპროტესტებენ „ქართული ოცნების“ პოლიტიკასა და ევროინტეგრაციის გზიდან გადახვევას, ოლიგარქის გუნდის პასუხი კი დრაკონული კანონების მიღება, დემონსტრანტებზე ძალადობა და დაკავებებია. 

“ადვოკატთა ასოციაცია არჩევნების გაყალებისთვის ემზადება” - რას ამბობს ყანდაშვილის კონკურენტი? - ღია ბრალდებები და დაპირისპირება.

ადვოკატთა ასოციაციის თავმჯდომარეობის ერთ-ერთი კანდიდატია მუხრან ღუწრკაია, ის პირდაპირ ამბობს, რომ ყანდაშვილი „ქართული ოცნების“ სასურველი კანდიდატია. რა არგუმენტი და მტკიცებულებები აქვს მას ამის გასარკვევად Tiflis 24.de-მა მასთან ვრცელი ინტერვიუ ჩაწერა.

Tiflis24: რა ფაქტორები და გონივრული ეჭვები გაფიქრებინებთ, რომ ირაკლი ყანდაშვილი “ქართული ოცნების” სასურველი კანდიდატია?

მუხრან ღურწკაია: ირაკლი ყანდაშვილი არის ადვოვაკტთა ასოციაციის მხარდაჭერილი კანდიდატი ეს არის ფაქტი. ყანდაშვილი იყო ადვოკატთა ასოციაციის აღმასრულებელი საბჭოს წევრი წლების განმავლობაში- დავით ასათიანის დროს, ადრეც. ასევე ტრენინგებს კითხულობს მედიაციასთან დაკავშირებით.

როდესაც რეგიონებში დავდიოდი შეხვედრებზე ჩემი შეხვედრების პარალელურად ატარებდა ტრენინგებს, რომ ჩემთან ადვოკატები არ მოსულიყვნენ. ადვოკატთა ასოციაციამ დანიშნა ტრენინგები ირაკლი ყანდაშვილის მონაწილეობით და რეალურად ტრენინგები კი არ ტარდებოდა, არამედ საარჩევნო კამპანია. ეს ხდებოდა ადვოკატთა ასოციაციის რესურსით, მათ შორის სასტუმროთი, კვებით, ვითომ ატარებს ტრენინგებს და რეალურად არის საარჩევნო შეხვედრა. როდესაც ასოციაცია ერთ კონკრეტულ კანდიდატს ასეთ უპირატესობაში აყენებს, მეტი რა უნდა იფიქრო? დღეს როდესაც პირდება კანდიდატებს ამას და ამას გავაკეთებ, აღმასრულებელი საბჭოს წევრი იყო წლების განმავლობაში და რატომ არ გააკეთა? აღმასრულებელი საბჭო იღებს ასოციაციაში გადაწყვეტილებებს, მე ვთვლი, რომ ასოციაცია პირდაპირ ლობირებს  მას.

Tiflis24: რა ურთიერთობა აქვს ყანდაშვილსა და ასოციაციის მოქმედ თავმჯდომარეს, დავით ასათიანს, რომელიც ადვოკატთა კონკრეტულ წრეებში „ქართული ოცნების“ კადრად მოიაზრება?

მუხრან ღურწკაია: მეგობრები არიან. რა ინფორმაციაც ჩემამდე მოდის თავად ასათიანი ეუბნება ასოციაციის წევრებს ღიად, რომ ყანდაშვილს უნდა დაუჭირონ მხარი. სწორედ ამიტომ ადვოკატთა ასოციაციიდან ურეკავენ ადვოკატებს, რომ ყანდაშვილთან შეხვედრაზე მივიდნენ. კოორდინატორი რეკავს, რომ არის ყანდაშვილთან შეხვედრა. რატომ არ რეკავს მუხრან ღურწკაიასთან რომ არის შეხვედრა, ან ირაკლი ჩომახაშვილთან? - გააფრთხილოს ხალხი თუ თანაბარ მდგომარეობაში გვაყენებს. ასოციაცია ყველასია და ნაიტრალური უნდა იყოს და მრარდაჭერა რომელიმეს მიმართ არ უნდა გამოთქვას. ასოციაციას უნდა, რომ ყანდაშვილი მათი გაგრძელება იყოს. მაგრამ მათ მხარდამჭერები რეალურად არ ჰყავთ. მთავარი მიზანია, რომ არჩევნებზე მოხდეს ე.წ. კარუსელი.

Tiflis24: რას ითხოვდით ასოციაციისგან იმისთვის, რომ ასოციაციის არჩევნებზე გაყალბების მექანიზმები მინიმალურამდე დაეყვანათ და რა მიიღეთ შედეგად?

მუხრან ღურწკაია:  აღმასრულებელი საბჭოს სხდომაზე ჩვენთვის მნიშვნელოვანი არცერთი პირობა არ დააკმაყოფილეს. არ აწყობდათ. აი რა ხდება:

1.   სამანდატო კომისია - დაკომპლექტებულია 30 კაცისგან, ადვოკატთა ასოციაციის თავმჯდომარე სრულად აკომპლექტებს შემადგენლობას. თქვეს, რომ 18 კაცი იქნება სტაფი და დანარჩენს დავიქირავებთ ხალხსო - ვინ არის ეს ხალხი არ ვიცით. 13 დეკემბერს მათ უნდა მიიღონ ხმის დამთვლელი კომისიის არჩევაში მონაწილეობა. ხმის დამთვლელი კომისიას 15 კაცს ვირჩევთ ჩვენ პორტალით, მაგრამ შედეგებს სამანდატო კომისია გამოაცხადებს. ჩვენ კი არცერთ კანდიდატს კომისიაში არცერთი წარმომადგენელი არ გვყავს წარმოგიდგენიათ? როგორ დაითვლის ეს ხალხი ადვოკატებმა ვის მისცა ხმა გაუკონტროლებელია, მერე რა რომ პორტალი არის. ეს 30 კაცი არჩევნებში 14 რიცხვშიც მონაწილეობს.

2.   დამკვირვებლები - თავიდან ერთი დამკვირვებელი იყო განსაზღვრული და ბრძოლის შედეგად მივიღეთ 4 დამკვირვებელი. ეს 4 დამკვირვებელი 18 აპარატს რას ეყოფა?

3.   ე.წ. კარუსელი - არიან ადვოკატები, რომლებსაც წევრობა შეჩერებული აქვთ და მოწმობა აქვთ. ვინც არ მოდის ამ მოწმობებს მისცემენ ნებისმიერ პირს, პირადობასთან ერთად შევა, როცა კომისიის წევრი არ გეყოლება არავინ არ გადაამოწმებს. მარტო დამკვირვებელი ყველაფერს ვერ გააკონტროლებს. ეს ადამიანი პირადობასთან ერთად მოვა, რომელსაც მოწმობა აქვს, თუნდაც სხვა პირის, სამანდატო კომისია არ გადაამოწმებს და ყუთში წავა მისი ბიულეტენი. აქ არის კარუსელი, რომელიც კონკრეტული კანდიდატის ხმების მისაღებად შეიძლება დატრიალდეს. ამიტომ ვითხოვდით სამანდატო კომისიაში კანდიდატებს.

სწორედ ამ ცნობებზე დაყრდნობით ვამბობთ ჩვენ, რომ ასოციაცია არჩევნების გასაყალბებლად ემზადება. მათ მხარდამჭერები ფაქტობრივად არ ჰყავთ, ამიტომ რაც უფრო მეტი ადამიანი მოვა არჩევებზე უმჯობესია. შეკრებებიდან გამომდინარე ყანდაშვილს ადვოკატების დიდი მხარდაჭერა არ აქვს. ასოციაციაში უნდათ, რომ არჩევნები წავიდეს ყანდაშვილის სასარგებლოდ.

Tiflis24: როგორ ფიქრობთ, როგორ გაგრძელდება ადვოკატთა ასოციაციის საქმიანობა თუ ყანდაშვილი გაიმარჯვებს?

მუხრან ღურწკაია: არ შეიძლება ადვოკატთა ასოციაციის თავმჯდომარობის კანდიდატს კითხვას უსვამდნენ გზის გადაკეტვაზე ჯარიმა 5 000 ლარი რომ არის რამდენად სამართლიანიაო? - გააჩნია ლეგიტიმურ მიზანსო. რაც უნდა ლეგიტიმური მიზანი იყოს გზის გადაკეტვისთვის ადამიანი არ უნდა დააჯარიმო და მეორე - სისხლის სამართლებრივი პასუხისმგებლობა არ უნდა იყოს. დაირღვა თუ არა კონსტიტუციის 78-ე მუხლი?- ამაზე რომ პოზიცია არ აქვს და არ აფიქსირებს როგორ შეიძლება ასეთმა კანდიდატმა დაიცვას ადვოკატების უფლებები, როცა ეს საჭირო გახდება? შეიძლება ასოციაციის თავმჯდომარისა და მისი მხარდამჭერი გუნდის განაწყენებას ერიდება და ამიტომ არ მაბობს, მაგრამ თუ ასე თვლის, ეს არის ძალიან ცუდი ფაქტი. თუ ყანდაშვილი გაიმარჯვებს ასოციაშიაში სტატუს კვოც კი არ შენარჩუნდება და ორგანიზაციის საქმიანობა წავა სტაგნაციისკენ. 

ყანდაშვილის დასკვნითი პრეზენტაცია თსუ-ში.

6 დეკემბერს ირაკლი ყანდაშვილმა საარჩევნო პროგრამის დასკვნითი ღონისძიება თსუ-ის I კორპუსი, სააქტო დარბაზში გამართა. ის ერთადერთი განდიდატია, ვისი საარჩევნო პროგრამის პრეზენტაციაც თსუ-ის სახელმწიფო უნივერსიტეტში ჩატარდა. დეტალების გასარკვევად უნივერსიტეტის რექტორს, ჯაბა სამუშიას დავუკავშირდით.

ანონსის ლინკი: https://www.facebook.com/irakli.kandashvili/posts/pfbid03KgFUKTGCo6Y91qM9Co7bLiwKZFvS5hb79YdK8DY58iUMMDV3MYrGpD2ZKrbagKGl 

ჯაბა სამუშია: „საქმის კურსში არ ვარ. შესაძლებელია იქირავა, ვერ გეტყვით. ჩვენთან არის ამის პრაქტიკა. სხვა ფორმატი არ არსებობს დარბაზის დათმობის. დეტალები არ ვიცი. საათობრივი დათმობა ხდება თუ არის ცარიელი დარბაზი. ღონისძიება ისეთი უნდა იყოს, რომელიც მეტნაკლებად არის დაკავშირებული საუნივერსიტეტო ცხოვრებასთან.

Tiflis24: ასოციაციის თავმჯდომარეობის კანდიდატის საარჩევნო პროგრამის პრეზენტაციას რა კავშირი აქვს საუნივერსიტეტო ცხოვრებასთან?

- ნუ ალბათ, თუ გავითვალისწინებთ მომავალ ადვოკატებს სახელმწიფო უნიევრსიტეტში, ნუ, ალბათ, არ ვიცი. პირდაპირ გიდასტურებთ, რომ ამ საკითხთან დაკავშირებით ნამდვილად არ ვიცი. ადმინისტრაციას მიმართეთ“,- ამბობს ჯაბა სამუშია Tiflis24-თან.

რას ფირობენ ადვოკატები?

ირაკლი ყანდაშვილის კანდიდატურასთან დაკავშირებით კითხვის ნიშნები აქვთ მოქმედ ადვოკატებს, რომელბმაც 13-14 დეკემბერს ასოციაციის არჩევნებში მონაწილეობა უნდა მიიღონ და ხმა ერთ-ერთ კანდიდატს უნდა მისცენ. მათ შორისაა ადვოკატი შოთა თუთბერიძე, რომელიც ბოლო წელიწად-ნახევრის განმავლობაში პროევროპულ აქციაზე დაკავებული არაერთი მოქალაქის უფლებას იცავს.

Tiflis24: ირაკლი ყანდაშვილი ასოციაციის თავმჯდომარეობის ერთ-ერთი კანდიდატია, რომლის კანდიდატურა და ნეიტრალურობა ღიად სადავო გახდა კონკურენტი კანდიდატის მხრიდან. თქვენ როგორც ადვოკატს რა პოზიცია გაქვთ მიმდინარე პროცესებთან დაკავშირებით?

შოთა თუთბერიძე: მე ვიცნობ ყველა კანდიდატს პირადად. მათ შორის ბატონ ყანდაშვილსაც. უხერხულობისა და ესპანურ სირცხვილად წოდებულ სირცხვილის განცდას იწვევდა ჩემში, როდესაც ვუყურებდი ყანდაშვილის ინტერვიუს BM.GE- თან. მე არ მაქვს ირაკლის კვალიფიციურობაზე იმდენად ცუდი წარმოდგენა, რომ მან არ იცის საქართველოში როგორ ირღვევა ადამიანის უფლებები წმინდა საკანონმდებლო დონეზე, თუმცა იგი ნორმატიული აქტის შეფასების დროსაც იყო მდუმარე და ცდილობდა გაქცეოდა კითხვას. ეს იწვევს გულისწყვეტას და უხერხულ სირცხვილს.

მეორე მიზეზი, რაც შეიძლება ამ გაქცევას უკავშირდება არის ის, რომ მას არ სურს კონკრეტული მოსაზრების ადამიანების წინაშე არ თქმა და მალავს თავის პოზიციას. დარწმუნებული ვარ კარგად იცის, რომ ადვოკატის როლი ქართულ მართლმსაჯულებაში ფეხქვეშ არის გათელილი სახელმწიფოს მიერ, მათ შორის სასამართლოს მიკერძოებულობის გამო, ამიტომ მას შეიძლება იმ ადამიანების გაღიზიანება არ უნდა, ვისაც შესაძლოა განსხვავებული პოლიტიკური პრეფერენციები ჰქონდეს ადვოკატთა შემადგენლობაში.  თუ ასოციასციის თავმჯდომარეობის კანდიდატს ჰგონია, რომ საკუთარი მოსაზრება არ წაადგება ელექტორალურად მაშინ რატომ მონაწილეობს საერთოდ არჩევნებში?

ყანდაშვილის ინტერვიუს რომ ვუყურებდი იგივე განცდა მაქვს ხოლმე ზუსტად, როცა ვუყურებ „ოცნების“ სპიკერებს, რომლებიც ცდილობენ პოზიცია არ დააფიქსირონ ადამიანების ქუჩაში ცემსა და რეპრესიულ კანონებზე და სახეზე ეტყობათ რა არის სწორი პოზიცია და არ ჰქოფნით გამბედაობა, რომ თქვან. საკუთარი პოზიციის შენარჩუნება და პირდაპირი სარგებლის მიღება უნდათ მმართველი პარტიისგან და ამიტომ იკავებენ თავს სიმართლის თქმისგანაც და იმის საუბრისგანაც, რასაც ფიქრობენ. ირაკლიმაც ასეთი შთაბეჭდილება დატოვა და შეიძლება ნამდვილად ვიფიქროთ, რომ მიზანი იყო არ გაეღიზიანებინა ელექტორალოდ ის ჯგუფი, რომლებსაც მკაფიო პოლიტიკური პრეფერენციები გააჩნიათ. თქვენ იცით, რომ ამ არჩევნების მიმართ არა მხოლოდ ადვოკატების დაინტერესებაა ძალინ მაღალი, არამედ სუს-ისა და სახელმწიფო სტრუქტურების ინტერესები მაღალია. სამწუხაროდ პოლიტიკური პროცესები გავლენას ახდენს ასოციაციის არჩევნებზეც და სახელმწიფო დაინტერესებულია, რომ თავმჯდომარედ ჰყავდეს „თავისი კაცი“.

Tiflis24: მოცემულ ინტერვიუს რომ გავცდეთ, არსებობს თუ არა კიდევ დამატებითი არგუმენტები, რაც გაფიქრებინებთ, რომ ირაკლი ყანდაშვილი სამთავრობო კანდიდატი შეიძლება იყოს?

შოთა თუთბერიძე: ბევრი ინდიკატორია, რაც მაფიქრებინებს, რომ ყანდაშვილი ალბათ ყველაზე სასურველი კანდიდატია სახელმწიფოს იმ სტრუქტურებისთვის, რომლებიც არჩევნებზე გავლენას ცდილობენ. მათ შორის არის ის ადამიანები, რომლებიც ასოციაციაში მხარს უჭერენ. ასოციაციას ბოლო წლების განმავლობაში როგორც მინუმუმ არგაღიზიანების პოლიტიკა ჰქონდა... სავარაუდოდ ბატონი ირაკლიც ამ ხაზს მიჰყვება და ასე გაგრძელდება მისი არჩევის შემთხვევაში.

ადვოკატები ჩვეულებრივი მოქალაქეები არიან არ უნდა დაგვავიწყდეს. მე არასდროს შემხვედრია ბატონი ირაკლის გამოხატული სამოქალაქო პოზიცია, რომელიც კრიტიკული იქნებოდა უარმრავი კანონდარღვევის, უსამართლობის, კონსტიტუციის დარღვევის მიმართ, რაც საქართველოში ბოლო პერიოდში ძალიან ხშირია. მაგალითად, ბექა ბასილაია რომ დააკავეს და ვერ პოულობდით, გატაცებული ჰყავდათ პრაქტიკულად, შემდეგ კი სცემეს, დავით ებრალიძე ორჯერ დააკავეს, მეც ორჯერ დამაკავეს - სამწუხაროდ ადვოკატური რეაქცია არც ასოციაციისგან მომისმენია და არც ბატონი ირაკლისგან.

Tiflis24: თვით, რომ მხარს ვინც უჭერს, მათგან გამომდინარე შემიძლია ვიფიქრო, რომ ყანდაშვილი  „ქართული ოცნების“ საურველი კანდიდატიაო. ამაზე მეტი შეგიძლიათ გვითხრათ, ვის გულისხმობთ?

შოთა თუთბერიძე: ზოგადად შემიძლია გითხრათ, რომ ასოციაციის ამჟამინდელი ხელმძღვანელი პირები, რომელბიც ნამდვილად მგონია, რომ „ოცნებასთან“ ძალიან ახლო კავშირები აქვთ. დავით ასათიანი ერთადერთია ვისი სახელი და გავრიც შემიძლია პირდაპირ დავასახელო, რომელიც საარჩევნო კანიდატების პრეზენდაციებზე ახლდა ბატონ ირაკლის თან. გარდა ამისა, ყველა პოლიტიკური პრეფერენციის ადვოკატები, კოლეგები, რომელთანაც მე მაქვს შეხება, ყანდაშვილს განიხილავენ როგორც ასათიანის მემკვიდრეს.  

Tiflis24: ყანდაშვილი პროევროპულ აქციებზე ადმინისტრაციული წესით  დაკავებულების ადვოკატი არასოდეს ყოფილა. საზოგადოებაც ნაკლებად იცნობს მის კანდიდატურას. გვითხარით რას საქმიანობს და რით არის ცნობილი პროფესიულ წრეებში?

შოთა თუთბერიძე: ირაკლი ყანდაშვილი არის მედიატორთა ასოციაციის დამფუძნებელი საქართველოში. მედიატრთა ასოციაცია არის ორგანო, რომელზეც შემიძლია ვთქვა, რომ თუ რომელიმე გაერთიანებას აქვს მიღებული ფინანსები უცხოელი დონორებისგან მათ შორის ერთ-ერთი პირველი მედიატორთა ასოციაციაა. ამ ორგანოს ჩამოყალიბებაში საერთაშორისო დონორობის როლი ძალიან დიდია. დღემდე ყანდაშვილს არ გამოუთქვამს საჯარო პოზიცია ჩვენი დასავლელი პარტნიორი ქვეყნების წინააღმდეგ არსებულ რიტორიკაზე. ის მედიატორია უცხო ქვეყნების სამედიაციო დაწესებულებაში და მე არ შემხვედრია მისი საჯარო განცხადება ჩვენი პარტნიორების მიმართ მტრულ პოლიტიკაზე. რა გული მოუთმენს ადამიანს რომ ხმა არ ამოიღოს, თუ მოტივაცია არ აქვს? ეს მოტივიაცია ყანდაშვილის შემთხვევაში ერთადერთია - მას პოლიტიკური აჯენდა აქვს, რომლის ფარგლებშიც ვერ გააკრიტიკებს პოლიტიკურ ძალას.

ირაკლი ყანდაშვილის კანდიდატურის შეფასებაზე კიდევ უფრო სიღრმისეული წარმოდგენა რომ გვქონოდა კიდევ ერთ ადვოკატს, თორნიკე მიგინეიშვილს დავუკავშირდით. თორნიკე მიგინეიშვილი შოთა თუთბერიძის მსგავსად ერთ-ერთია იმ უფლებადამცველებს შორის, რომლებიც სასამართლოებში პროევროპულ აქციაზე დაკავებულების უფლებებს იცავენ.

Tiflis24: უპირველესად გთხოვთ, შეაფასოთ ირაკლი ყანდაშვილის ინტერვიუ, რომელშიც მას კონსტიტუციის 78-ე მუხლის დარღვევაზე ეკითხებიან - თქვენ რა დაინახეთ ან რა ვერ დაინახეთ მისი პასუხიდან?

ფოტო: ნეტგაზეთი

თორნიკე მიგინეიშვილი: ბოლო ერთი წლის განმავლობაში ჩვენ ვნახე სრულად მდუმარე ასოციაცია, რომელიც ყველაზე ხმაურიანი უნდა ყოფილიყო ამ პერიოდში. რაც შეეხება ყანდაშვილს, არათუ არჩევის შემთხვევაში, არამედ არჩევნებამდეც კი  უკვე არ არსებობს მისი მხრიდან რაიმე სახის ცალსახა პოზიცია არა პოლიტიკური, არამედ წმინდა სამართლებრივი კუთხით. დაირღვა თუ არა კონსტიტუციის 78-ე მუხლი ეს რომ არ ყოფილიყო სამართლებრივი საკითხი, ამაზე მსჯელობა არ იქნებოდა სასამართლოში, ასევე, არ იქნებოდა არაერთი სარჩელი, ასევე, ევროპულ სასამართლოში გაგზავნილი არაერთი სარჩელის საფუძველი ეს მუხლი - აქედან გამომდინარე, ყანდაშვილის პასუხებს თავის არიდებად უფრო ვაფასებ, ვიდრე იმას, რომ შეიძლება იყოს პოლიტიკური მსჯელობის საკითხი.

Tiflis24: თუ ფიქრობთ, რომ მან ევროინტეგრაციის დარღვევასთან დაკავშირებულ კითხვას თვალი აარიდა, მაშინ ვის ან რას მოერიდა ის?

თორნიკე მიგინეიშვილი: მარტივია, პასუხის გაცემა, თუ რატომ შეიძლება აარიდო ამ კითხვას თავი. პირევლი - ალბათ, შენი ხედვები უკავშირდება მმართველი პარტიის ხედვებს და არ გსრურს, რომ შენი პასუხები წინააღმდეგობაში მოვიდეს მათს ხედვებთან. მეორე- კიდევ უარესი, შეიძლება შენ თავად თვლიდე, რომ ეს კონკრეტული მუხლი არ დარღვეულა. ორივე ტრაგედიაა.

თუ შენ, როგორც იურისტი, ამას ფიქრობ ტრაგედიაა, თუ არ ფიქრობ, მაგრამ ამ მდგომარეობაში იძულებული ხარ, რომ საკუთარი თავი ასე აფიქრო, რთულია იმის წარმოდგენა რა შეიძლება მოხდეს შემდგომ წლებში, როდესაც თავმჯდომარე იქნები.

Tiflis24: ყანდაშვილის პროფესიულ საქმიანობაზე თუ შეგიძლიათ გვითხრათ მეტი, რა გზა აქვს გავლილი მას ბოლო წლებში?

თორნიკე მიგინეიშვილი: ბოლო ერთი წელია ჩართული ვარ როგორც ადმინისტრაციულ საქმეებში, ისე სისხლის სამართლის სამქეებში. მე არსად ეს ადამიანი არ მინახავს. მე არსად მინახავს რომ ამ რპოცესში დაზარალებული ადამიანების მიმართ რაიმე სოლიდარობა გამოეცხადებინა, მე არ მინახავს არცერთი მხარდამჭერი განცახდება მისგან. მე მიუხედავად იმისა, რომ აქტიურად ვარ ჩართული ამ ყველაფერში, ასეთი რამ არ შემხვედრია.

Tiflis24: როგორ ფიქრობთ, როგორ გაგრძელდება ასოციაციის საქმიანობა თუ ყანდაშვილი არჩევნებში გაიმარჯვებს?

თორნიკე მიგინეიშვილი: ტრაგედია მგონია, რომ იქნება მსგავსი პოზიციის მქონე ადამიანის ასოციაციის სათავეში ყოფნა. ყველაზე ცუდ ვარიანტში მე ვხედავ ამ ადამიანის თავმჯდომარეობის პირობებში იმაზე ცუდ მდგომარეობას ასოციაშიაში, ვიდრე არის.

ყანდაშვილის სტუნდეტი საკუთარ ლექტორზე.

კიდევ ერთი ინტერვიუ Tiflis24-მა ირაკლი ყანდაშვილის სტუდენტთან, სამართლის ლექტორთან, არჩილ ჯანგირაშვილთან ჩაწერა.

Tiflis24: არჩილ, თქვენ, როგორც ყანდაშვილის სტუდენტს, რა პოზიცია გაქვთ მის ინტერვიუსთან დაკავშირებით, სადაც კითხვას კონსტიტუციის დარღვევასთან დაკავშირებით უსვამენ და ვერ ან არ აფიქსირებს აზრს?

არჩილ ჯანგირაშვილი: ვერ ამბობს არა, არ ამბობს! ირაკლი ყანდაშვილი ჩემი ლექტორი იყო დიახ, და შესაბამისად ზუსტად ვიცი, რომ ნამდვილად შეუძლია თქვას დაირღვა თუ არა. აქ საკითხი დგას რატომ არ თქვა? და რატომ არ თქვა ამაზე ჩემი აზრი არის შემდეგი: დღეს სისტემა არის ისე მოწყობილი, რომ გინდა, ახლოს იყო სახელმწიფოსთან, ამიტომ არის ასოციაცია ჩემთვის მიუღებელი.

ყანდაშვილი არ არის იმ ტიპის იურისტი, რომელიც ვერ ხვდება 78-ე მუხლი დაირღვა თუ არა. პასუხი იყო პოლიტიკურ დისკუსიაში ვერ შემოვალო. კონსტიტუცია არის ქვეყნის უზენაესი ნორმატიული აქტი და იურისტები მოქმედების აქტადაც ვიყენებთ კონკრეტულ მოცემულობებში. რატომ უნდა გაუჭირდეს კანდიდატს თქვა დაირღვა თუ არა 78-ე მუხლი? იცის ყანდაშვილმა დარწმუნებული ვარ, მაგრამ არ უნდა, რომ ვიღაცები გააბრაზოს და ეს ვიღა ვინ არის ყველამ იცის.

Tiflis24: ვინ არის გვითხარით, ვის გაბრაზებას მოერიდა? რადგან არსებობს აზრი, რომ ის სამთავრობო კანდიდატია.

არჩილ ჯანგირაშვილი: ამას პირდაპირ ვერავინ დავამტკიცებს. ცალკე აღებული ფორმალურად კერძო პირია, კერძო სივრცეში საქმიანობს, მედიაციის მიმართულებით მუშაობს, ხელფასით არ არის დამოკიდებული სახელმწიფოზე. პირდაპირი კავშირით ვერ დადგინდება, მაგრამ აქ მარტივია დაისვას კითხვა: იურისტს რატომ უნდა გაუჭირდეს კონსტიტუციის რომელიმე მუხლის შეფასება?  იყო ძალიან მარტივი კითხვა - დღეს რომ არ გინდა საჯაროდ განაცხადო ეს, აბა მაშინ ვინ არ გინდა გააბრაზო? ჩვენ რომ ვთანხმდებით, რომ 78-ე მუხლი დარღვეულია ეს ხომ ფაქტია?! ჩემთვის, როტოც იურისტისთვის მიუღებელია რომ ეს კითხვა პოლიტიკური შეფასების საგნად წარმოაჩინა, არ არის პოლიტიკური ეს არის სამართლებრივი.

Tiflis24: თქვენ როგორ წარმოგიდგენიათ როგორ გააგრძელებს მუშაობს ასოციაცია ყანდაშვილის გამარჯვების შემთხვევაში?

არჩილ ჯანგირაშვილი: მე არ ვიცი ყანდაშვილს აირჩევენ თუ არა, მაგრამ მე მგონია, რომ როდესაც მას სტუდენტები უყურებენ, იურისტმა არა მხოლოდ ცოდნის, არამედ ღირებულებითი თვალსაზრისითაც უნდა აჩვენოს რაღაცები. მხოლოდ იმის თქმა, რომ ეს პოლიტიკის საგანია, მიუღებელია.

Tiflis24 - ის პოზიცია: გამომდინარე იქიდან, რომ ადვოკატთა ასოციაციაში დაგეგმილ არჩევნებთან დაკავშირებით ჩვენი რესპონდენტები ასოციაციის თავმჯდომარეობის ერთ-ერთ კანდიდატს, ირაკლი ყანდაშვილს ღიად ასახელებენ, როგორც პოლიტიკური აფილაციის მქონე პერსონად, ბუნებრივია, გვქონდა ვალდებულება, რომ ჩვენი პლატფორმა მისთვის დაგვეთმო და სტატიაში მისი პოზიციაც ყოფილიყო დაფიქსირებილი.

სწორედ ამ მიზნით ირაკლი ყანდაშვილს დავურეკეთ და შევთავაზეთ, ყველა კითხვასა და ბრალდებაზე პასუხი გაეცა, მაგრამ თავად ეს არ ისურვა.

ღიად ვაცხადებთ, რომ ჩვენს რედაქციას არანაირი მორალური, ეთიკური ან ნებისმიერი სხვა სახის დილემა არ ჰქონია, რომ საზოგადოება ყანდაშვილის პოზიციასაც გაცნობოდა.